Kuongeza kipato cha ufugaji mjini

MIAKA michache ya hivi karibuni, Serikali baada ya kuona hali ya Mtanzania inazidi kuwa ngumu kiuchumi, basi ikawa imependekeza mbinu mbalimbali za kujiongezea kipato ili mradi kuweza kukabiliana na hali hiyo. Kwanza kabisa Serikali ikatangaza kuwa siku ya Jumamosi iwe ni siku ya mapumziko ambapo wafanyakazi wataweza kupata nafasi ya kujifanyia shughuli zao binafsi kama vile kwenda mashambani, kufanya shughuli za ufundi na nyinginezo.

Licha ya kufanya shughuli hizo za mashambani na za ufundi,lakini pia zikawa zimekubaliwa shughuli nyingine kama vile ufugaji. Hvyo kukaanzishwa miradi mbalimbali ya kufuga kuku, kufuga ng,ombe, nguruwe, mbuzi, bata nk. Watu wakaanza kufuga ng’ombe wa maziwa , wakawa wanafuga kuku wa mayai na wa nyama. Ni kweli kuwa miradi hiyo ikawa imeshamiri sana na hivyo watu wakaweza kujikusuru kwa namna fulani.Ikatokea hata wafanya kazi wengine wakaamua kuacha kazi na kujiingiza katika mambo ya miradi hiyo ya ufugaji hasa wa kuku.

Jambo la kusikitisha na kwamba mahali pa kufanyia shughuli hizo za ufugaji hapakuwa pameandaliwa. Hivyo wale waliokuwa wameamua kufanya shughuli hizo wakatafuta kila mahali palipowezekana. Ikawa imetokea kuwa watu wakawa na mabanda na hata vizizi karibu na nyumba za kuishi. Kumekuwa na vizizi vya kufugia ng’ombe karibu kila kona ya miji yetu na hasa katika jiji la Dar Es Salaa. Ufugaji huo ni kweli unaleta kero kubwa sana kwa wakazi wengine wa mjini. Ni jambo la kuudhi sana kushuhudia harufu mbaya sana katika sehemu mbalimbali za miji. Kuna sehemu ukipita unakumbana na harufu ya mavi ya ng’ombe, kuna sehemu nyingine mtu anakumbana na mavi ya kuku, sehemu nyingine unasikia harufu ya mbuzi. Ukizunguka huko unatishwa na harufu ya nguruwe. Hivyo uzuri wa mji hauko kabisa kwani harufu chachu zimeenea licha ya harufu za uchafu wa kawaida kutoka majumbani mwao.

Licha ya huo uchafu, hao wanyama kama vile mbuzi hata ng’ombe wanaleta kero kubwa sana hasa wanapoachwa kuzagaa mitaani. Imekuwa ni kawaida ya wafugaji wengi kuwacha hao wanyama wao wazagae mitaani na hivyo kuleta usumbufu mkubwa sana kwa watu wapitao hasa madreva.Inaonekana kuwa pengine hao wafugaji au wenye wanyama hao hujiamini kiasi kwamba wanaona hao wanyama hawawezi kutendewa cho chote kile na hivyo mwenye kuwa na tahadhari siyo mfugaji, bali mpitaji.

Ni kweli kuwa ufugaji, kma ulivyokusudiwa ni zoezi na kazi nzuri na yenye faida kwa mwananchi. Lakini inapofikia kiwango cha kuleta kero na hata kuhatarisha maisha ya binadamu wengine, hapo sharti njia nyingine zichukuliwe ili mambo yaende vizuri. Tunapenda kumpongeza Mwenyekiti wa Tume ya Jiji, Ndugu Charles Keenja kwa hatua ambazo atazichukua ili kuliweka Jiji letu katika hali nzuri, na njia mojawapo ni kuwaondoa hao wanyama wanaozangaa mitaani. Tunatumaini kuwa hao wafugaji watamwelewa vizuri na hivyo kuweza kukubaliana na uamuzi wake huo.

Ni kweli kuwa hakuna mfugaji anayependa kuwa mbali na mifugo yake. Lakini tena kwa upande mwingine haiwezekani kabisa kuruhusu faida ya mtu binafsi iwadhuru na kuwakosesha raha majirani. Mtu anapoamuwa kuishi pamoja na wenzake anapaswa daima kujitahidi kuondoa mambo yale ambayo huleta kero na usumbufu kwa majirani. Kuleta mifugo ndani ya miji, au kuishi karibu na mifugo ni kinyume kabisa cha afya. Hao wanyama kwa ujumla ndio wenye kuleta mainzi mengi katika miji yetu na hivyo kusababisha magonjwa kama vile kipindupindu. Ni nani asiyetambua kuwa kinyesi cha kuku au cha ng’ombe huleta mainzi ambayo huhatarisha afya za watu?

Nawakumbuka sana wale Wamisionari wetu waliotuletea Dini ya Kikristo pamoja na ustaarabu, jinsi walivyokuwa wanaitunza mifugo yao. Popote pale walijenga vizizi vya ng’ombe, vya nguruwe na kuku mbali na nyumba za kuishi watu. Tunasema kuwa huo ndio ustaarabu halisi. Lakini inapofikia kuwa mtu anakuwa na zizi la ng’ombe au nguruwe katika sehemu anayoishi na wenzake, hapo tunatambua kuwa kuna kasoro katika ustaarabu wetu. Kuna watuwengi wanaanzisha miradi ya ufugaji bila kufanya utafiti kuhusu sehemu anayotaka kufanyia huo ufugaji, hasa kuhusu afya na usumbufu kwa majirani. Jambo linalotawala mara nyingi ni ule ubinafsi, yaani kutafuta tu faida ya binafsi bila kuangalia kama wengine wanaathirika na mradi huo au sivyo.

Katika Kauli Yetu hii kwanza tunapenda kuwapongeza hao wenzetu wafugaji kwa jitihada hizo za ufugaji wa wanyama mbalimbali. Tunawapongeza sana kwa juhudi wanazozifanya katika kuwatunza wanyama hao kama vile kutafuta chakula, majani, madawa na mambo mengineyo ambayo hutakiwa kwa ajili ya mifugo yao hio. Linakuwa ni jambo la kutia moyo sana tuonapo magari madogo yakipita barabarani huku yamebeba majani kwa ajili ya ng’ombe. Tunasema hongera sana.Lakini pia tunawasihi kama inawezekana, shughuli hizo zingefanyika huko mashambani na hivyo kupunguza kero za wakazi wa miji .

Ikiwa tumeamuwa kuishi mijini, basi tunapaswa kweli kushika taratibu za mijini. Hapo tunapoambiwa kuwa tuache ufugaji wa wanyama mijjini, tunapaswa kuwa watii. Miji yetu inapaswa kuwa kama vioo vya nchi yetu hasa Jiji letu la Dar Es Salaam. Sisi hatuelewi ni kwa jinsi gani wageni hutuona wanapotutembelea na kufika kushuhudia sehemu mbalimbali za Jiji zimejaa ng’ombe, nguruwe, kuku nk. Na sehemu hizo zinajulikana kama ni sehemu za watu wakubwa hapa nchini. Tunasema tabia hiyo ni ya aibu kabisa na tunapaswa kuondokana nayo kabisa tukitaka kweli jiji letu na miji yetu kwa ujumla ilinganelingane na miji mingine hapa ulimwenguni.

Tunapenda pia kuimalizia Kauli Ysetu hii kwa kumpongeza Mwenyekiti wa Tume ya Jiji katika hatua anazozichukua ili kulifanya jiji letu lipendeze.Hivyo pia tunatoa rai na kuwaomba Wakurugenzi wote wa miji yetu hapa nchini wasilionee aibu jambo hili la kuiweka miji yetu katika hali nzuri ya kupendeza. Hao Wakurugenzi watambue kuwa ni wajibu wao wa kuyafanya mazingira ya miji yetu yawe mazuri na ya kupendeza kwa wakazi wake na pia kwa wale wote wanao ishi humo.

Wakatoliki tujirudi kiimani

Mhariri,

Jambo jema ukitaka litendeke, anza mwenyewe

Ndugu Mhariri,

Tuwajibike makazini

Ndugu mhariri,