KABLA ya kufunga mwaka wa 2001, tulishauriwa kufanya tathmini ya utendaji wetu wa mwaka huo uliopita.

Wananchi wengi walihimizwa kujichunguza kuona ni wapi hawakufanya vizuri na wapi walifanya vizuri katika utendaji wao wa kila siku.

Wapo waliofanikiwa kukamilisha mipango yao kutokana na bidii yao katika utendaji. Pia, wapo ambao hawakuweza kukamilisha mipango yao kwa sababu mbalimbali.

Ili kuweza kupiga hatua mbele katika maendeleo, hatuna budi kuwa na mipango bora ya utendaji katika kazi zetu. Kwa hiyo basi tunalopaswa kufanya toka mwanzo kabisa wa mwaka ni kuwa na mipango kabambe ya utendaji wetu.

Kila mmoja wetu anapaswa kuwa na mipango maalumu ya kila siku, kwa kila mwezi, kwa mila miezi sitasita na hata kwa mwaka mzima.

Licha ya mipango hiyo ya mtu binafsi, inafaa pia kuwapo kwa mipango bora ya kifamilia kwa kuwa yapo mambo mengi wanayoweza kufanya ili kujiletea maendeleo katika familia zao.

Kwa vile binadamu tumepewa akili na Mwenyezi Mungu, hatuna budi kuzitumia akili hizo ili tuweze kuleta maendeleo. Tutatumia akili hasa kwa kuwa na mipango thabiti ya utendaji.

Watanzania wengi ni wavivu sana; wavivu katika kutumia akili zao, na pia wavivu katika kutumia nguvu zao.

Wananchi walio wengi hupoteza muda wao mwingi katika kuzungumza na katika mambo ya starehe kama vile kunywa pombe.

Wataalamu hutuambia kuwa muda wetu wa kuishi hapa duniani ni mfupi mno ukichukulia kuwa kwa miaka hiyo michache tunayopewa kuishi hapa duniani hutupasa kulala usingizi, kula, kusali na shughuli nyingine nyingi.

Hivyo, ukiangalia kwa makini utabaini kuwa muda unaosalia ni kidogo sana na inatupasa kuutumia vizuri ili kujipatia maendeleo ya kimwili na kiroho.

Ukiangalia hali ya nyumba zilivyo kule vijijini, hutisha sana. Nyingi ni zile zinazoitwa "mbavu za mbwa", yaani mtu anaweza akasimama nje na kuona kila kitu kilichopo na nini kinaendelea ndani.

Papo hapo hao wenye nyumba hawashituki, wako tu wakiendelea kupumzika bila kufanya chochote kile. Hivyo pia mazingira ni machafu sana ambayo huweza kukaribisha magonjwa mbalimbali.

Tatizo ni kwamba wananchi wengi hawana moyo wa kujituma ili kujiletea maendeleo. Lakini, wengi wameridhika sana na hivyo hakuna nguvu ya kujimudu ili kujiongezea kipato na kubadilisha hali zao za maisha.

Pamoja na kuwa na mipango, yatupasa kuwa na wivu wa kimaendeleo na papo hapo kuwa wabunifu na waaminifu. Binadamu ni kiumbe mwenye akili na hivyo, hana budi kutumia akili, yaani kuona watu wengine wanafanya nini, na papo hapo kuomba ushauri kwa wale ambao wako mbele katika kujitegemea na mwenye maendeleo.

Tunambiwa kuwa yatupasa kujifunza kila siku na kila mahali na kutoka kwa mtu ye yote yule mwenye maendeleo ya kweli. Wako binadamu ambao kutokana na kiburi cha maisha hawataki kujifunza lolote kutoka kwa wenzao. Hao wamejaa kiburi ambacho ni kizingiti kukubwa katika maendeleo.

Kwa hiyo, mwaka huu wa 2002 hatuna budi kupiga hatua mbele katika kujiendeleza na hasa katika kuwa na mipango binafsi na ya familia zetu.

Tusilale na kuamka bila kuwa na kitu madhubuti cha kufanya ili kutuongezea kipato chetu. Tuachane kabisa na uvivu ili tuweze kulisukuma gurudumu la maendeleo kwa kuweza kubadilisha hali zetu ili zizidi kuwa bora zaidi na zaidi.

Wale wataalamu wa Kirumi walikuwa na msemo wa maswali ya kujiuliza katika kujitafutia maendeleo ya mtu binafsi.

Walisema hivi: Ikiwa mtu mwanaume amefaulu, na ikiwa mtu mwanamke amefaulu kwa nini nami nisifanikiwe? Hivyo ndivyo nasi tunavyopaswa kujisemea kila siku tukitaka maendeleo.

Labda ni kuwa na nyumba, hapo tunaona kuna wanaume wengi waliofanikiwa kuwa na nyumba nzuri.

Pia wapo akina mama wengi ambao wamefanikiwa kuwa na nyumba nzuri, na kwa nini wewe usifanikiwe?

Labda ni kulima, hapo pamekuwa na wakulima wengi, ambao wamefanikiwa katika kazi hiyo kutokana na juhudi zao. Je, kwa nini wewe usifanikiwe

Kwa hiyo tusijione wanyonge na hivyo tukakata tamaa ya na kuacha kujitafutia maendeleo. Tukiwa na nia, tutafanya mwaka huu wa 2002 kuwa ni kweli mwaka wa maendeleo na mabadiliko katika hali zetu za maisha.

Hayo yote yawezekana tu ikiwa tutatimiza wajibu wetu ipasavyo. Tuache uvivu na uzembe na badala yake tuwe na ule wivu wa kimaendeleo ili tuutumie mwaka 2002 kujiltea maendeleo ya kweli.

KIONGOZI wekeni picha za Ubatizo na Harusi

-MHARIRI-