MAANDIKO Matakatifu yanatuambia kuwa umri wetu sisi binadamu wa kuishi hapa duniani ni miaka sabini (70) na tukiwa na nguvu zaidi ni miaka themanini (80). Lakini mambo yanavyokuwa siku za leo na hasa katika nchi yetu ni tofauti mno. Tunaona watu wengi na hasa vijana ambao hawajafikia miaka arobaini wanakufa kwa wingi sana.

Kuondoka kwa kundi hili la watu wenye umri mdogo kunapoteza ile tunayoiita "nguvu kazi".

Maisha ya binadamu hutoweka kwa njia nyingi kama vile maradhi, ajali na ile ya kawaida ya uzee. Tunatambua kuwa magonjwa kama vile malaria, kipindupindu, kifua kikuu, na maradhi mengine ya tumbo yamekuwa ni ya kawaida na yana tiba zake. Lakini kuna huu ugonjwa mbaya uliojitokeza miaka ya hivi karibuni, unaojulikana kama UKIMWI, ni wa hatari sana kwa vile hauna kinga wala tiba. Wataalamu wamejitahidi sana kutuletea dawa za kupambana na magonjwa hayo mbalimbali,lakini kwa bahati mbaya gonjwa hilo la UKIMWI halina tiba yoyote mpaka hivi sasa.

Ni jambo la kusikitisha sana kuona watu wengi ambao hawajatoa mchango wowote wa maendeleo katika taifa letu wanakufa katika umri mdogo sana. Serikali na vyombo vingine katika taifa letu imejitahidi sana kuwaelimisha wananchi kuhusu ubaya wa ugonjwa huo.

Kumekuwa na mashirika ya kimataifa ambayo yamejitolea kwa hali na mali katika kuwaelimisha wananchi kuhusu ugonjwa huo wa UKIMWI. Viogozi wetu sasa hivi wanaimba wimbo huo kila mahali katika kuwaangalisha wananchi na hasa vijana kuhusu ugonjwa wa UKIMWI.

Hivyo pia hata mashirika ya kidini hufanya kila jitihada ya kuwaangalisha wananchi katika kujiepusha na ugonjwa huo wa kutisha. Mbinu mbalimbali zinabuniwa katika kujikinga na ugonjwa huo, kwa vile hauna tiba bado. Kwa vile ugonjwa unaoua siyo siri ya watu wachache au wa rika fulani tu, basi kila mahali hata huko mashuleni wanafunzi wanafundisha kuhusu maana ya ugonjwa huo na tahadhari zake.

Kumetangazwa njia nyingi na mbinu mbalimbali za kuepukana na ugonjwa huo. Kwa vile imebainishwa kwamba njia kuu kabisa ambayo watu wengi huupata ugonjwa huo ni ile ya kukutana kimwili au kujamiiana, basi mkazo mkubwa sana umetiliwa katika kuwa waangalifu katika vitendo vya mapenzi.

Kuna methali isemayo kuwa ukiona mwenzako ananyolewa, basi ujue kuwa itafika nawe zamu yako, kwa hiyo tia maji nywele zako. Maana ya methali hiyo ni kwamba unapaswa kujikinga na kujitetea unapoona ndugu yako yuko katika shida. Ni jambo la kusikitisha sana kuona wananchi wengi sana hawashituki kabisa na hawataki kabisa kubadilisha mienendo na tabia zao mbovu za kufanya mapenzi ovyo ovyo. Hakuna asiyetambua kuwa karibu kila familia siku ya leo ina marehemu ambao wamekufa kutokana na ugonjwa huu wa UKIMWI. Na kwa asili mia kubwa ni kutokana na kufanya matendo ya mapenzi ovyo ovyo.

Inashangaza kuona jinsi binadamu alivyo shupavu katika jambo hilo licha ya kushuhudia vifo kila siku. Takwimu kuhusu ugonjwa huo wa UKIMWI ni kubwa mno na zinatisha sana.

Ni kweli kuwa tendo la kufanya mapenzi limo katika sirika la binadamu, lakini papo hapo tunatambua kuwa matendo yote ya binadamu huongozwa na akili pamoja na utashi. Kwa hiyo binadamu lazima aulinde uhai wake kwa kutumia akili yake na utashi wake. Inapotokea kuwa binadamu anatawaliwa tu na tamaa zake za mwili na hivyo kufuata vionjo vyake bila kutumia akili na utashi wake hapo huwa ni vigumu sana kumtofautisha na kiumbe mwingine.

Binadamu kila tunapoona kuwa mbele yetu kuna hatari kubwa, basi hapo inatupasa kuchukua tahadhari kubwa zaidi. Lakini tunaposikia kuwa jambo hilo linachukuliwa kuwa ni bahati mbaya au "ajali kazini", hapo tunakatishwa tamaa kweli kweli.

Kuna mambo mengi sana ambayo husababisha watu wafanye mapenzi ovyo ovyo. Mojawapo ni ‘ULEVI’ wa pombe. Tunavyofahamu ni kwamba mtu akishalewa hupoteza nguvu zake ya kujitawala na kujishinda katika mambo ya kijinsia. Kwa mtu aliyelewa tamaa za mwili huamka upesi na hasa ikiwa mtu wa jinsia nyingine yuko karibu naye na pengine kwa hali ya kuvuta tamaa. Watu wengi hufanya mapenzi katika hali ya ulevi. Kwa hiyo ni sharti kujiangalia kwani ni lazima kabisa kukwepa mazingira yenye kumwingiza mtu katika kutenda mambo mabaya. Kuna watu wengi wanaosujudu ulevi wa kupindukiwa na hivyo wanafanya mambo ya mapenzi bila aibu, na mapato yake ni kupatwa na magonjwa, hasa ugonjwa huu wa UKIMWIi.

Licha ya ulevi wa pombe, lakini pia kuwa jambo jingine linalowafanya watu wengi wafanye mapenzi kutokana na utajiri pia umaskini. Wengi wanasema kuwa kuna watu maskini na watu matajiri ambao wanakufa kutokana na mali walizo nazo na pia wengine kutokana na umaskini walio nao. Kumbe wanaokufa kutokana na ugonjwa huu wa UKIMWI ni wale wenye utajiri kwa sababu utajiri huo unawavuta na kuwadanganya akina mama wengi na hasa wasichana. Pia hao akina mama au wasichana hudanganyika kutoka na umaskini wao na kuwa tayari kupata misaada yenye masharti kutoka kwa hao matajari na watu wenye uwezo.

Hapo jambo linalotakiwa ni kutumia busara kwa yule mwenye mali na vile vile kwa yule ambaye hali yake ni mbaya kifedha.

Tunaambiwa kuwa siyo kila kinachong’aa ni dhahabu, yaani siyo kila mtu anayependeza machoni au mwanaume au mwanamke, basi ni safi pia ndani ya mwili wake. Kumbe inafaa kabisa kujihadhari ni urafiki wowote ule siku hizi. Tutumie ile kanuni ya wanausalama kuwa tusimwamini mtu ye yote na tumtilie mashaka mtu ye yote katika jambo hili la mapenzi, kwani hakuna uhakika wa usalama. Ni kweli kuwa kila dini inakataza kabisa mambo ya kufanya mapenzi nje ya ndoa na kushika hilo tutakuwa salama kabisa. Tusicheze na hatari, kwani UKIMWI unaua. Kila siku tunashuhudia vifo kutokana na ugonjwa huu, tujiepushe na hatari hizo kwani miaka yetu ya kuishi ni sabini na hata themanini. Hapo tutakuwa tumetoa kweli mchango wetu wa maendeleo katika taifa letu.