TUNAELEKEA mwisho wa mwaka huu wa 2000, ambao umekuwa ni mwanzo wa milenia ya tatu.

kwa Wakristo, tumeuita ni Mwaka Mtakatifu na pia, Mwaka wa Jubilei Kuu. Katika mwaka huu, kumekuwa na mambo mengi ambayo yamefanyika kitaifa, kijimbo, kiparokia na hata katika jumuiya ndogondogo za Kikristo.

Kwa jumla, tunaweza kusema kuwa katika mwaka huu wa 2000, kumekuwa na mambo mengi ambayo yametendeka katika kuuadhimisha.

Katika Kanisa Katoliki la nchini Tanzania, licha ya kufanyika kwa ibada mbalimbali pamoja na mikesha, mafungo na kupokea Sakramenti, pia kumekuwa na kuutembeza Msalaba wa Jubilei katika maparokia na jumuia mbalimbali za Kikristu.

Maajabu mengi yametendeka katika ibada mbalimbali za Msalaba. Waamini wameubeba, wamekesha nao hata wamekuwa wakifanya Ibada Takatifu mbele yake.

Wenye matatizo mbalimbali kutokana na imani yao kwa Msalaba huo, wamesaidiwa kwa namna moja au nyingine. Kwa kifupi, tunaweza kusema kwamba kwa njia ya Msalaba waamini na wasio waamini wameamshwa imani yao katika chombo hiki cha ukombozi wa wanadamu.

Jubilei hii Kuu, inatukumbusha hasa tendo la Ukombozi alilolifanya Bwana Wetu Yesu Kristu kwa kutufilia Msalabani ili aweze kutupatanisha tena na Baba wa Milele tuliyekuwa tumemwasi kwa kutenda dhambi.

Kwa upande wetu sisi waamini Wakristo, Msalaba unatufundisha mambo mengi yakiwamo matendo mema kama vile huruma, upendo na uvumilivu wa Bwana wetu Yesu Kristu.

Msalaba ni ishara wazi kwetu sisi Wakristo unaonesha kwamba tumekombolewa kwa njia hiyo na hivyo, tunapaswa kuuenzi na kuutukuza bila kuuonea aibu wala kuwa na woga wo wote.

Ni dhahiri kabisa kuwa tunao wapinzani wengi wa chombo hicho cha Ukombozi hapa na pale. Lakini, tunatumaini kuwa heshima ambayo tumeupatia Msalaba mwaka huu, itazidi kuongezeka katika jamii yetu.

Tumesema kuwa jambo kubwa katika kuutukuza Msalaba ni kutambua hasa kuwa ni kitu gani tunafundishwa kutokana nao.

Jambo muhimu na kubwa tunalofundishwa nao, uvumilivu na kusameheana. Uvumilivu ni fadhila kubwa sana tunayohitaji katika maisha yetu.

Katika jamii, tunaishi na binadamu wenzetu ambao wanye tabia tofauti na za aina mbalimbali.

Ni kwa maana hiyo, hatuna budi kutumia upendo, heshima, utu na kuvumiliana kwa hali ya juu kwa kuwa kwa namna yoyote iwayo, hatuwezi kukwepa kabisa maudhi na kutokuelewana miongoni mwa jamii.

Ni kwa maana na nafasi hiyo, tunapaswa kuukumbuka Msalaba ambao kwa njia yake Kristo anatufundisha kuvumilia.

Tunapaswa kuvumiliana katika familia zetu, katika jumuiya zetu na mahali po pote pale ambapo tunaishi na kushirikiana na wenzetu.

Waamini wote ambao wanashiriki katika kuubeba Msalaba, kuutolea heshima na kuufanyia ibada, wanapaswa kuwa wamebadilika kabisa katika tabia.

Hivi sasa katika taifa letu tunajiandaa kwa Uchaguzi Mkuu wa rais, wabunge na madiwani. Kampeini zinafanyika hapa na pale kwa maneno pengine yasiyopendeza masikioni mwa wengi.

Tunapaswa kuvumiliana na hivyo kuchukuliana tabia hizo zilizo tofauti kwa jinsi zilivyo.

Litakuwa ni jambo lisilo sawa sawa ikiwa raia Wakristu ambao wameshiriki kikamilifu katika ibada ya Msalaba, watakuwa katika mstari muovu wa kuleta fujo na kuvunja amani katika nchi yetu.

Ikiwa Wakristo ambao wameubeba na kukesha na Msalaba watakuwa na uvumilivu kati yao, hapo tutaonja mapato na matunda yake kwa kuiletea amani nchi yetu.

Kwa maneno mengine, tunaweza kusema kuwa kwa njia ya Ibada Takatifu ya Msalaba, waamini Wakristo watazidi kuwa chumvi na mwanga katika jamii yetu ya Tanzania.

Ni kwa njia hizo za ibada kwa Msalaba, wataleta utamu katika nchi yetu, yaani watawapatanisha wananchi wenye kufarakana kwa sababu za kisiasa au kidini.

Tunafundishwa kwamba Kristo kwa kuwambwa kwake pale Msalabani, aliwakusanya wafuasi wake wote na wale ambao siyo wafuasi wake.

Tumeshuhudia kwamba katika Mwaka huu wa Jubilei wakati wa kuutembeza Msalaba, siyo waamini Wakristo pekee yao walioshiriki katika ibada hizo, bali na hata wale wasio waamini Wakristo.

Jambo hilo limetufundisha kwamba kwa njia ya Msalaba, tunapaswa kuwa kitu kimoja hasa katika taifa letu. Tunaweza kuhitilafiana katika mawazo yetu, lakini kutoka na mawazo tofauti tusifarakane wala kugombana, bali tuyabadili mafarakano na kuwa patano ilanalojenga zaidi umoja, upendo na manani baina yetu.

Tunapenda kuwapongeza viongozi wetu wa Kanisa, maaskofu walitoa uamuzi wa kuutukuza Msalaba kwa namna ya pekee katika Mwaka huu wa Jubilei.

Tunapofanya tathmini ya maadhimisho ya Jubilei Kuu, Ibada ya Msalaba husimama mahali pa pekee kabisa.

Wengi wametambua umuhimu na maana ya Msalaba katika kumfuata Kristo. Msalaba kama tulivyosema, ni alama wazi kabisa ya ukombozi wetu kwani hakuna Ukombozi bila Msalaba.

Kwa miaka hiyo yote 2000 ya Ukristo wetu Msalaba umekuwa ni kitambulisho thabiti cha ufuasi wetu.

Pia, Msalaba huo umekuwa kiunganishi chetu waamini, sisi kwa sisi na pia sisi na wenzetu wasio waamini Wakristu.

Tunazidi kutoa rai kwa waamini wenzetu Wakristu kwamba tuendelee kuuenzi Msalaba ambao ni chombo cha Ukombozi wetu.

Kwa njia ya kuuangalia Msalaba tunapaswa kujifunza kuvumiliana na kuchukuliana kama Kristo mwenyewe alivyofanya katika kazi hiyo ya kutukomboa kwa Msalaba na kifo chake.

Tuzidi kuwa na imani zaidi katika Msalaba na hivyo tuutangaze kwa kuuishi tukivumiliana na kusameheana daima tunapokoseana iwe ni katika familia, katika jumuiya zetu na hasa katika taifa letu kwa ujumla.

Itakuwa aibu na fedheha na hata kuudhalilisha Ukristo sambamba na Mwaka huu Mtakatifu wa 2000, kama atajitokeza atakayeisliti nafsi na imani yake, akawa kichocheo cha vurugu katika jamii.

Uchafuzi wa mazingira Kibakwe ni mradi wa maendeleo ya Afisa Misitu