MARA baada ya Uchaguzi Mkuu wa Kwanza kuvishirikisha vyama vingi vya siasa katika mfumo wa kidemokrasia mwaka 1995, jamii ya Watanzania ilianza mikakati kwa ajili ya Uchaguzi mwingine unaoufuatia. Ndio huu unaofanyika Jumapili hii ya Oktoba 29.

Watanzania tunalo jukumu kubwa kuuthibitishia ulimwengu kuwa busara, amani, upendo na mshikamano tulivyo navyo, hatukuvipata kwa bahati mbaya; bali ulikuwa ni mpango sahihi wa Mungu kutufanikishia kuwa nayo.

Watanzania wote Bara na Visiwani kama ndugu moja, wote wanasongwa na jukumu hilo kubwa la kutumia busara na hekima kuwapata viongozi safi na waadilifu; watakaoliongoza Taifa la Tanzania kwa kipindi kingine cha miaka mitano.

Kwa kujua umuhimu wa zoezi hili, Watanzania wa Bara wanajitokeza kwa wingi Jumapili hii kuwachagua madiwani, wabunge na Rais wa Jamhuri ya Muungano wa Tanzania.

Nao Watanzania wa Visiwani, wanakabiliwa na jukumu la kuwachagua viongozi hao waliotajwa, na nyongeza ya Rais wa Serikali ya Mapinduzi ya Zanzibar, pamoja na Wawakilishi wa Baraza la Wawakilishi.

Siku hii ni muhimu katika historia ya Watanzania kwa kuwa kwanza, ni siku ya Uchaguzi katika mfumo wa vyama vingi ambao ni wa kwanza nchini kwa uzoefu kwa kuwa wa kwanza ambao labda tuuite wa majaribio, ulikuwa ule wa mwaka 1995.

Tunasema hivi tukiamini kabisa kuwa makosa kadhaa hata ambayo Tume ya Taifa ya Uchaguzi imekiri kuwa yalijitokeza, kwa kiasi kikubwa yalitokana na jamii nzima wakiwamo wagombea, vyama na wafuasi wao pamoja na Tume yenyewe, kutokuwa na uzoefu katika Uchaguzi wa katika mfumo wa kidemokrasia wa vyama vingi kwa kuwa ulikuwa mtindo mgeni.

Tunajua dhahiri kuwa yapo baadhi ya mataifa machache yaliyokodoa macho ya uchu yakisubiri kushangilia na kupenyeza mizizi ya ukoloni ndani ya nchi yetu yatakapoona eti Watanzania tumekumbwa na pepo wabaya wa machafuko.

Mataifa hayo yanasubiri kwa hamu kushangilia watakapoona Watanzania tunamwaga damu kwa makusudi kutokana na tofauti za kisisasa na zoezi zima la uchaguzi na uroho wa madaraka.

Kubwa zaidi, mataifa hayo yasiyoitakia mema Tanzania, yanasubiri yaitumie nchi kama mfano wa mtu mpumbavu anayejua kuwa yeye ni mshindani, lakini hataki kushindwa.

Katika siku hii ya Uchaguzi Mkuu wa Pili (Jumapili Oktoba 29, 2000), Busara za kila Mtanzania zitaonekana bayana pale kila aliyejiandikisha kupiga kura, atakapoamka na kwenda mapema kwenye kituo chake cha kura na kumchagua kiongozi anayemtaka kwa kuwa ni haki na siri yake.

Busara za Watanzania zitadhihirika endapo kila aliyeanzia kanisani, atauombea uchaguzi huu uanze kwa amani na kumalizika kwa amani na utulivu kisha yeye mwenye akaenda kupiga kura yake halali.

Busara za kila Mtanzania zitaonekana endapo hakuna atakayefanya kosa la kutaka kupiga kura zaidi ya mara moja kwa kuwa ni kinyume kabisa cha sheria na taratibu za uchaguzi.

Busara za kila Mtanzania zitabainika endapo hakuna mpiga kura atakayempigia kura mgombea yeyote aliyetumia lugha za vitisho, ulaghai na kumshawishi kwa rushwa ili amchague kwa kuwa huyo si kiongozi bora.

Busara za kila Mtanzania zitaonekana kama kila Mtanzania atalikana kabisa jaribio lolote la kumtaka kuuza au kununua shahada ya kupigia kura.

Kwa kuwa Watanzania tangu zamani tumerithi hekima za amani, utulivu, udugu, mshikamano na umoja wa kitaifa ambao unayafanya hata mataifa mengine makubwa yatuonee gele na kutuita KISIWA CHA AMANI,busara za Watanzania zionekanae pale tu, kila mmoja atakatumia uwezo wake wote kukana na kukemea kila hoja na jaribio la kuvuruga uchaguzi au kuanzisha vurugu zinazoweza kuhatarisha amani na usalama.

Hatuna shaka kuwa kila Mtanzania anajua kuwa Tanzania ni Tanzania kama ilivyobatizwa kwa jina la KISIWA CHA AMANI na hivyo, hatungependa Tanzania ibatizwe kwa mara mnyingine na kuitwa BURUNDI, KONGO, KOSOVO na kwingineko kwenye utovu wa nidhamu na amani kwa kuwa hata kwenye Maandiko Matakatifu, hakuna yanapomtaka mtu abatizwe mara mbili. Jina la KISIWA CHA AMANI LINATOSHA.

Tunachosema sisi ni kwamba, kila mtu kwa nafasi yake awajibike kulinda amani na utulivu, awajibike kufuata taratibu na kumchagua kiongozi anayefaa.

Kila mgombea azingatie ukweli kwamba asiye kubali kushindwa, si mshindani. Hivyo akubali matokeo halali.

Suala la kung’ng’ania madaraka ni la kishamba na limekuwa chanzo cha matatizo katika nchi nyingi na hata kusababisha mauaji kwa kiasi cha kutisha mno.

Suala hilo ni la kizamani na limepitwa na wakati. Na kibaya zaidi mtu anayeng’ang’ania madaraka, ajue dhahiri kuwa kwamba hawapendi Watanzania na kadhalika Watanzania nao hawampendi na hivyo, hatufai.

Tungependa kutoa wito kwa vyombo husika vya usalama kuona kuwa hakuna anayepewa mwanya wa kuchezea amani na roho za Watanzania kutokana na ushabiki wa kishamba na uchu wa madaraka.

Ushabiki au namna ya kampeni aidha kwa mavazi, mabango nyimbo na mikutano, siku ya kampeni vidhibitiwe kwa maana halisi ya udhibiti.

Endapo tutaichezea tunu hii ya amani aliyopewa Hayati Baba wa Taifa Mwalimu Nyerere atuletee toka kwa Mungu, tukiipoteza tutamlipa nini Mwalimu Nyerere ili aikabidhi kwa Mungu ambaye alituandalia?

Shime Watanzania tutumie busara kuwachagua viongozi wetu, tutumie busara, tukubali matokeo kwa njia ya amani, tutumie busara tuilinde amani ya nchi.

Tusipozingatia hayo yale tunayoyaona kwenye televisheni, katika nchi nyingine tutayashudia kwetu wenyewe.

Hivi ikiwa hivyo, watoto wetu tutawaacha wapi, tutawarithisha nini na tutajibu nini kwa Mungu endapo Watanzania wenyewe tutakuwa vyanzo vya machafuko na mauaji ya Watanzania wenyewe?

MUNGU UBARIKI UCHAGUZI MKUU, MUNGU IBARIKI TANZANIA.

Hiini faraja kubwa kwa wakazi wa Mkoa wa Morogoro na maeneo jirani ambao kwa pamoja wanafaidika na matangazo ambayo yanarushwa na kituo hicho cha Radio.

Ni matumaini yangu kuwa, kuanzishwa kwa kituo hicho cha radio kutaleta changamoto kubwa kwa wakazi wa Mkoa huo ambao kwa muda mrefu hawakuweza kupata huduma za matangazo moja kwa moja na badala yake kupata huduma hizo za matangazo ya radio kupitia mikoa mingine.

Vile vile napenda kutoa pongezi kwa viongozi na watangazaji wote wa Radio Ukweli kwa juhudi zao wanazozifanya ili kuweza kufanikisha zoezi zima la kuwapatia wakazi wa Mkoa wa Morogoro burudani maridadi.

Mwisho ningependa kuwaomba wakazi wa Mkoa wa Morogoro washirikiane bega kwa bega na Uongozi na watangazaji wa radio hii ili kuweza kuboresha kituo hicho badala ya kukaa na kufanya majungu yasiyo faa!

Magabe Changwe,

C/O Box 640

KIGURUNYEMBE

MOROGORO.

Mbona hatupati taarifa za waliotelekeza maiti ya mjamzito Tarime?

Tabata tutakufa kwa kukosa maji