Moyo wa kujitolea ni muhimu kwa Watanzania

MARA baada ya nchi yetu kujipatia uhuru, viongozi na hasa Hayati Baba wa Taifa, Mwalimu Julius Kambarage Nyerere, walitujengea moyo wa kufanya kazi, hususani za kujitolea ili kulijenga taifa kwa nguvu zetu.

Kulikuwa na shughuli mbalimbali zilizofanyika kwa moyo huo kama vile, ujenzi wa madarasa, nyumba za walimu, zahanati, hospitali mabarabara na vingine vya namna hiyo.

Raia na hasa vijana walilelewa katika msingi wa kujitolea na hiyo ndiyo maana hata kukawapo na Jeshi la Kujenga Taifa(JKT).

Mipango mizuri sana ilifanyika na watu wakazifanya shughuli nyingi chini ya mpango huo wa kujitolea katika maeneo wanayoishi; kwa hali na mali.

Hiyo ilitokana hasa na Watanzania kuijua hali halisi ya nchi yetu kiuchumi. Kila raia alielimishwa na akafahamu ukweli kuwa nchi yetu ni maskini, na hivyo hatutafika popote kimaendeleo bila kuwa na moyo wa kujitolea. Moyo huo wa kujitolea ukajengeka pia katika shida za dharura hasa zile za maafa.

Ulipotokea uharibifu katika maeneo yetu hasa ya vijijini, wananchi walialikana chini ya uongozi wa kijiji na hivyo kuweza kurekebisha pale ambapo mambo hayakuwa sawasawa.

Uharibifu wowote uliojitokeza, ulishughulikiwa mara moja na hivyo mambo yakaenda kwa utaratibu kama kawaida.

Lakini siku ya leo mambo hayo yamerudi nyuma kabisa na karibu hakuna tena ule moyo wa kujitolea; sehemu nyingi na kwa watu wengi nchini.

Gazeti la NIPASHE, la Jumatano, Julai 12, mwaka huu, kuna habari isemayo kuwa Wanafunzi wakosa masomo miezi tisa, kisa, madarasa yao kuezuliwa mapaa. Kwanza tunawapa pole wanafunzi hao kwa maafa hayo ya kuharibikiwa shule.

Tunasema hiyo ni habari ya kusikitisha na ya kutisha kabisa. Tena, ni ya aibu, na kinyume cha utamaduni tuliojijengea kwa miaka mingi.

Tunasema kuwa ni jambo la kutisha kwani kwa wanafunzi wetu kukosa masomo kwa muda wa miezi tisa, ni jambo zito hasa ukitilia maanani kwamba kila saa ya mwanafunzi kuwemo darasani ni ya muhimu wa namna yake.

Inampasa mwanafunzi apate masomo katika mazingira mazuri. Lakini, ikiwa mwanafunzi atasomeshwa chini ya mwembe au katika darasa linalovuja kutokana na paa kuharibiwa na kimbunga, kweli mambo ni magumu.

Kwa ukubwa sana hatuwezi tukategemea wanafunzi waanaosoma katika mazingira kama hayo, wataweza kufanikiwa kimasomo ipasavyo.Kuhusu tukio hilo la Shule ya Msingi ya Mloda, kata ya Makang’wa, wilaya ya Dodoma Vijijini, tunajiulliza, ni kweli sehemu hiyo ina uongozi unaofaa au sivyo?

Inakuwaje kwa muda wa miezi tisa wanafunzi wakose masomo wakati mahali hapo pana Waratibu wa Elimu na maafisa mbalimbali wa elimu.

Tunatambua kuwa hali ya wananchi kule kiuchumi siyo nzuri, lakini, hata hivyo tunasikitika kusema kuwa uongozi wa kata, wa tarafa na hata ule wa wilaya umezembea kabisa suala hilo la kurekebisha hali ya shule hiyo.

Pia tunajiuliza huyo Mbunge wa sehemu hiyo anafanya kazi gani kuhusu maendeleo ya elimu katika jimbo lake? Je, wananchi watakuwa kweli na moyo wa kumpatia kura zao hapo Oktoba 29 baada ya kuonesha uzembe kama huo?

Tunarudia kusema kuwa jambo hilo ni la aibu sana kwani inaonekena kuwa viongozi wa sehemu hiyo hawatambua wajibu wao hasa katika shida kama hizo.

Huo ni mfano mmoja tu kati ya mingi inayotokea hapa na pale.

Kwa vile kama tulivyosema hapo mwanzoni hakuna moyo wa kuwajibika na kujitolea katika nchi yetu, kuna shule na majengo mengi ya umma ambayo pengine yangehitaji matengenezo ya haraka, lakini yanaendelea kuharibika kama vile hayana mwenyewe. Ni kweli sisi Watanzania kwa ujumla hali zetu kifedha siyo nzuri, lakini papo hapo tunao ule utajiri wa nguvu ya kufanya kazi. Tatizo kubwa hatupendi kujituma wala kujitolea na hivyo kufanya kazi kwa sifa ya taifa letu, labda kidogo kwa ajili ya faida yetu binafsi.

Kibaya zaidi, kwa wananchi wengi siku ya leo hakuna moyo wa kufanya kazi kwa ajili ya kujenga taifa, ingawaje tunahimizwa kwamba taifa letu litajengwa hasa na watu wenye moyo wa uzalendo na kujituma.

Tunapenda kutoa rai yetu kwa viongozi hasa wabunge, wakuu wa wilaya, tarafa na kata, wakuu wa mashina wawe karibu au katikati ya watu waweze kuona matatizo ya watu na watoe msaada wa hali na mali.

Viongozi hao wanapaswa kuwa mstari wa mbele katika kuhimiza utendaji kati ya wananchi.

Kiongozi ni yule anayekwenda mbele na watu wanamfuata nyuma yake. Lakini kama kiongozi anafifia kabisa na hivyo kukaa mbali na wananchi, hataweza kamwe kuongoza ipasavyo.

Tunahitaji viongozi wanaoona shida za wananchi na wanakuwa nao bega kwa bega katika kuziondoa.

Tunatumaini tunapoelekea Uchaguzi Mkuu wa mwaka huu, ni vema tunakalifikiria jambo hilo. Tuwapatie kura viongozi ambao kweli watakuwa na wananchi kwa ukaribu zaidi huku wakijua matatizo yetu na kutusaidia katika kuyatatua.

Kwa upande wa wananchi, tungependa sana kuona moyo wa kujitolea unafufuliwa na kuendelezwa tena katika taifa letu. Inatupasa kufanya kazi nyingi za kujitolea kwani bado hatuna pesa za kutosha.

Tuwe na uchungu na nchi yetu ambayo kweli ni maskini. Tusingojee kila kitu kutoka Serikali Kuu kwani nayo ina mambo mengi ya kufanya kitaifa. Kuna mambo mengi ambayo yako chini ya uwezo wetu na tunaweza kuyafanya na kuokoa pesa nyingi.

Sasa nii wakati mwafaka wa kufanya kazi mbalimbali siyo kwa ajili ya kupata malipo, bali hasa kujenga jina katika taifa letu kama wafanyavyo wenzetu walioendelea ambao wako tayari kutoa nguvu zao kwa ajili ya kujenga majina.

Nasi pia tuone ni sifa ikiwa tunaweza kufanya kitu fulani kwa ajili ya jumuiya na hivyo majina yetu yakaingia katika historia ya Tanzania.

Kibakwe: Chagueni Mchumba anayefaa