Polisi katika vituo vya uchaguzi; wajua wajibu wao?

WAKATI taifa linaelekea Uchaguzi Mkuu wa Pili wa Vyama vingi vya Siasa Oktoba 29 mwaka huu, vyombo husika na jamii kwa jumla havina budi kufumbua macho na hata kutumia Uchaguzi wa mwaka 1995 na chaguzi ndogo zilizofuatia kama kioo na hivyo kurekebisha na kuondoa makosa yaliyojitokeza ili yasijirudie.

Moja ya matatizo yaliyojitokeza katika Uchaguzi wa 1995, ni upya wa dhana ya demokrasia ya vyama vingi kwa wananchi walio wengi.

Hii inatokana na ukweli kuwa, wananchi waliojishirikisha katika harakati za kudai uhuru kwa takribani miaka 30 ya nyuma, walikuwa wachache mno.

Licha ya Tume ya Taifa ya Uchaguzi kukiri kuwa ililemewa katika maeneo kadhaa; kama kuchelewesha kwa masanduku na makaratasi ya kupigia kura vyama vyenyewe vya siasa kikiwamo Chama Tawala, havikuwa tayari vimetambua umuhimu na uzito wa kazi iliyowakabili hadi wanaingia ulingoni.

Katibu Mkuu wa CCM Bw. Philip Mangula, hivi karibuni alikiri hilo wakati akizungumza katika Mkutano wa Nane wa Kitaifa kuhusu hali ya kisiasa Tanzania ili kusawazisha uwanja wa ushindani wa siasa uliofanyika jijini Dar-Es-Salaam.

Tunaipongeza Serikali kwa kuhimili jazba kubwa la vyama vya siasa ambavyo vingi pamoja na wafuasi wake vilikuwa nje kabisa ya wigo na taratibu sahihi za kinyang’anyiro cha Uchaguzi.

Kwa kuzoea na hata kubweteka katika mfumo wa chama kimoja, bado umma haukuwa unajua umuhimu wa uchaguzi huo katika kusukuma gurudumu la maendeleo na ndiyo maana yeyote aliyechaguliwa, kwao alikuwa ni sawa; bora liende.

Kwa mujibu wa Taarifa ya Tume ya Uchaguzi kwa majuma mawili ya mwanzo Agosti hadi Septemba, ni asilimia 26.7 tu ya watu waliotarajiwa, walikuwa wamejiandikisha kupiga kura.

Hali hii ililazimu muda kuongezwa huku viongozi wa kata na vyombo vya habari kuongeza sauti kupigia kelele umuhimu wa kujiandikisha hata sasa wakafikia milioni 8.9.

Ni kweli uliojidhihirisha wazi kuwa wakati wa kampeni, ama vyama havikutumia; au vingi havikuwa na Ilani wala Programme za kunadi kwa wananchi ili wavichague.

Kilichojitokeza zaidi ni vyama kung’ang’ania dola na kwenda Ikulu. Hiyo ikageuza kampeni kuwa viwanja vya matusi na vitisho.

Mangula amesema hiyo ndiyo ilikuwa agenda ya kujikusanyia kura.

Tunalaani mtindo huo uliopelekea vyama vya upinzani karibia vyote, kukisakama kwa matusi Chama Cha Mapinduzi.

Pia tungependa safari hii kupitia wagombea wake, CCM isitishie wapiga kura wakati wa kampeni mbalimbali kuwa wapinzani wakichukua madaraka, Tanzania itageuka iwe Rwanda, Burundi, Kongo au Kosovo kwa kukosa amani.

Tunasema Uchaguzi bila Ilani inayokitambulisha chama na sera zake katika kuwaongoza Watanzania, ni vurugu tupu ambazo hatuna haja nazo.

Safari hii hatupendi kuambiwa fulani kafanya hivi,ameshindwa kufanya hivi hatutaki maana tumeona na tunaona tunachotaka wagombea watuambie watafanya nini na watatumia mbinu gani.

Tunasema hivyo kwa kuwa hatutaki Mtanzania yeyote apoteze haki yake kwa kumchagua kiongozi kapi eti kwa kuwa alisukumwa na uoga wa vitisho na jazba la ulaghai na hatimaye, akamchagua kiongozi kwa misingi batili ya ukabila, udini na mingine isiyojenga umoja wa kitaifa.

Kwa kuwa suala la amani na utulivu ni muhimu hasa katika kipindi cha uchaguzi, ni jukumu la serikali kudhibiti vurugu zote wakati wote wa shughuli za uchaguzi ili zifanyike kwa faida ya umma.

Viongozi wa vyama vyote hawana budi kuungana na kuwa mstari wa mbele kuzuia vurugu za wafuasi wao na kila Mtanzania ajue kuwa ulinzi wa Tanzania ni jukumu la kila Mtanzania na hasa mzalendo.

Licha ya elimu au uzoefu anaoweza kuwa nao, ni kiongozi asiyewafaa Watanzania, endapo atatumia ishara au kauli yoyote inayoelekea kuchochea vurugu na kupoteza amani nchini; huyo, haifai Tanzania.

Kwa mujibu wa Ibara ya 63 (2) (j) ya Sheria ya Uchaguzi No.1 ya mwaka 1981, kila kituo cha Uchaguzi hakina budi kuwa na mlinzi wa amani. Hiyo ni muafaka na haistahili kupingwa.

Kwa kuwa polisi hawatoshi, ipo haja ya kutumia walinzi wengine wa amani.

Hata hivyo suala la idadi ya polisi au Walinzi vituoni, sio hoja sana. Suala linalotia utatani kwamba, polisi (walinzi) hao wakati wanasimamia uchaguzi katika vituo vyao, wanajua wanayopaswa kufanya kwa mujibu wa sheria na taratibu?

Je, wanajua ni watu gani wanaruhusiwa kuingia kituoni kwa mujibu wa sheria? Na kwamba watu hao wanatakiwa kuwa katika hali gani?

Je, wanazijua kanuni zinazoelezea mambo muhimu ya kuzingatia katika kituo cha kupigia kura; ikiwa ni pamoja na utaratibu wa kujipanga mstarini?

Ni dhahiri kuwa wasimamizi wa vituo hupata semina kabla ya kwenda vituoni. Lakini, polisi hawapewi semina na elimu za namna hiyo za kutosha.

Wanafika kwa msimamizi na kuoneshwa Mkuu wa Kituo na Msaidizi wake; kisha wanafuatana hadi kituoni.

Je, Hiyo tu, inatosha wajue na kutimiza wajibu wao?

Tume ya Taifa ya Uchaguzi na vyombo vingine husika hawana budi kuzingatia ukweli kuwa wasimamizi wa vituo wana kazi nyingi na hivyo siyo rahisi wakamudu kuwafundisha polisi kila kitu siku ya uchaguzi pale vituoni zikiwemo kugundua fujo zinazoendelea katika mistari ya wapiga kura au eneo la mita 100-200 toka alipo.

Ni vyema polisi ‘wakanolewa’ vya kutosha kabla ya kupelekwa katika vituo vya kupigia kura wakiwa hawajui wanayopaswa kufanya.

Kupigana mbele ya marehemu ni kuzidhalilisha dini zetu

Naomba unipe walau nafasi kidogo katika gazeti lako hili la kidini, ili nieeleze na kuishauri serikali yetu kupitia Wizara yake ya Afya.