Tutumie vizuri muda tulio nao

MARA kwa mara tumesikia wataalamu wa kituambia kuwa wakati ni mali na tunapaswa kuutumia vizuri. Hao wataalamu hutuambia kuwa muda tunaokuwa nao kwa ajili ya kufanya kazi huwa ni mfupi sana kwani tunao muda wa kupumzika usiku kwa zaidi ya masaa matano, tunao muda wa kula chakula, ambao pia haupungui masaa matatu kwa siku. Tunao muda wa burudani na michezo, ambao pengine huzidi hata masaa matano kwa siku. Kwa wale waumini, wanao muda wa kusali ambao kwa siku pengine siyo pungufu ya saa moja. Tunatumia pia muda mrefu katika kuwa hudumia wenzetu, kama vile kwenda kuwaangalia wakiwa huko mahospitalini au m ajumbani wamelala. Tunatumia masaa mengi sana katika kusafiri kwenda huko na huko kikazi. Kila mmoja wetu hutumia muda wa kutosha katika mambo ya usafi wake binafsi, usafi wa mazingira anamoishi, usafi wa vyombo, usafi wa nguo zake nk.

Ukishaangalia hivyo jinsi muda unavyotumika au pengine unavyopoteza hapo utatambua kuwa tunakuwa na muda mfupi sana katika kufanya kazi za maendeleo. Lakini jambo la kusikitisha, ni kwamba licha ya kuwa na huo muda mfupi katika siku nzima kwa ajili ya kufanya kazi, bado kuna wananchi wengi ambao hawautumia muda huo sawa sawa. Wako wengi ambao wamejenga ile tabia ya kupoteza muda. Kwao hao ndugu kuwahi mahali wanapotakiwa ni vigumu sana, na hivyo huanza kazi wakiwa wamechelewa. Ni tabia mbovu sana ya mtu kuchelewa kuanza kazi anapotakiwa. Tabia ya kuchelewa imejengeka kabisa ndani ya wananchi wengi hapa Tanzania. Hapo hawakumbuki kabisa kwamba wanapochelewa wanakwamisha pia ufanisi wa shughuli katika sehemu zao za kazi.

Siku ya leo hasa katika miji kuna visingizio vingi vya watu kuchelewa kufika kazini mapema. Kisingizio kikubwa kinachotolewa ni kila cha ugumu wa usafiri. Hilo ni kweli, lakini ikiwa mtu anajua kuwajibika atapanga kuwahi kuondoka nyumbani mapema. Na akifika kule kazini ni sharti ahakikishe kwamba anafanya kila jitihada ya kulipiza ule muda ambao amechelewa kwa kutia bidii zaidi ya utendaji. Lakini inashangaza sana kuona mfanyakazi kachelewa kufika kazini, na akifika kule kazini anatumia muda mrefu sana katika kuzurura na kufanya mambo yasiyohusikana na kazi yake. Wengi wa wafanyakazi hujivutavuta kazini na kupoteza muda mwingi sana katika mambo ya upuuzi.

Kati ya mambo mazuri yaliyotokana na sera ya ubinafsishaji mashika mbalimbali ni wafanyakazi kuwa na bidii katika sehemu zao za kazi. Wale wanaofanya kazi katika mashirika yale ambayo yamebinafsishwa wanajua jinsi ya kutumia muda. Kwa vile riziki yao hutegemea sana jinsi wanavyotumia muda wao, hapo tunao kuna uzalishaji wa hali ya juu sana. Hivyo pia ni katika ajira katika shughuli na kazi za watu binafsi, kwani kipato chao kwa vikubwa hutokana na jinsi wanavyozalisha au wanavyotumia muda wao wa kufanya kazi.

Tumeambiwa mara kwa mara kuwa muda ni mali, na hivyo inatupasa kuutumia vizuri katika uzalishaji. Kwa bahati mbaya kuna wengi wa wananchi bado wanatumia muda wao vibaya na hata kuna wengine ambao licha ya kulala usiku kucha, bado wanalala hata mchana bila kufanya kazi. Tunaambiwa kuwa kazi ni uhai, lakini wananchi wengi wanaona kuwa kazi ni utumwa na hivyo hawataki kabisa kufanya kazi ya kuajiriwa na hata ile ya kujiajiri. Watanzania walio wengi hutumia muda wao mwingi sana katika kuzungumza bila kuchoka na hivyo hakuna kinachozalishwa, licha ya kuwa na nguvu pamoja na afya nzuri.

Mara nyingi tumesema sana katika safu yetu hii kuhusu uvivu na uzembe. Tungeweza kusema kuwa tabia hiyo ya uvivu ni kama donda ndugu kwa Watanzania walio wengi. Vijana wengi na hata watu wazima wameridhika kabisa na hali duni walio nao na hivyo wanautumia muda wao mwingi sana katika mambo ya upuuzi. Tunazo nguvu kazi nyingi sana, yaani vijana na watu wazima wenye nguvu ya kufanya kazi za kuiendeleza nchi yetu hii, lakini muda huo hutumika katika ulevi na uzururaji mitaani.

Watanzani wengi tunaishi bila kuwa na ratiba ya kufanya kazi na wala kuwa na mipango ya kazi. Wengi huishi kwa kubahatisha kwani hakuna mipango yo yote ile ya kujiendeleza. Hata hivyo kuna baadhi ya Watanzania ambao wametambua kwamba muda ni mali na sharti kujiletea maendeleo katika maisha yao. Hao hutumia muda wao vizuri wakiwa wanayo ratiba ya siku nzima. Wamejipangia ni saa gani ya kuamka, saa ya kwenda kazini, saa ya kula chakula, saa ya kupumzika na kwenda kulala. Hao tunasema huishi kwa mipango na pia wana uchu wa maendeleo. Lakini kwa bahati mbaya utakuta pembeni mwao kuna wale ambao hawashtuki na lo lote liwe, hawana wivu wa kimaendeleo wanayoyaona kwa majirani zao.

Kwa nini mtu anaridhika kabisa na hali duni, licha ya kuwa na akili pamoja na nguvu? Kwa nini mtu anaridhika kuwa na nguo hafifu na papo hapo jirani ana nguo nzuri? Kwa nini mtu aishi katika nyumba mbovu, na papo hapo jirani yake awe na nyumba nzuri katika mazingira hayo hayo. Jibu lake tunasema ni kiburi na tabia ngumu ya kutopenda kuiga mazuri ya wenzetu. Leo tumo katika mwaka wa 2000 wa sayansi na tekinolojia. Haitawezakana kamwe kujivunia mwaka huu au

Wataamu huzidi kutuambia kwamba kinachohesabika hasa siyo wingi wa miaka tuliyoiishi hapa duniani, bali ni kitu gani tumekifanya wakati tukiwa duniani. Kuna wengi wameishi zaidi ya miaka 50, lakini wameacha umaskini tu hapa duniani. Uthibitisho wa jambo hilo tunaushuhudia wakati wa kufa jamaa ambaye alikuwa na uwezo baada ya kutumia nguvu na muda wake vizuri akaweza kujipatia mali.Ni kwa jinsi gani wanafamilia na wanaukoo wanavyogombania mali ya marehemu. Tunasema ama kwa haki ni tabia mbovu sana kutegemea cha ndugu wakati wewe mwenyewe una nguvu na wasaa wa kuzalisha unapokuwa mzima.

Tunamalizia Kauli Yetu kwa kuwasihi Watanzania kutumia muda katika kufanya kazi za kujiendeleza kwa ajili yao binafsi na hasa kwa ajili ya ndugu na jamaa pamoja na taifa hili kwa ujumla. Tuige mifano ya wenzetu walioendelea kwani maendeleo hayo yametokana na kufanya kazi kwa bidii wakitumia muda wao vizuri. Tusipofanya kazi kwa bidii tutazidi kuwa maskini na pia watumwa wa wale wenye kujituma katika kufanya kazi. Mwaka huu wa 2000 uwe ni mwaka wa kutumia muda vizur i zaidi na kuwa na mipango ya utendaji kila mahali inapotupasa kushughulika. Kazi ndiyo pambo la maisha ya binadamu.

Salamu kwa Wafungwa

Mimi ni mama Ebliible, mama kiroho Italiano.

Mama Elotilole

Watoto zingatieni ujumbe mliopewa na Askofu Pengo

Nitafurahi sana endapo utanipa nafasi katika gazeti lako la KIONGOZI ili niweze kutoa maoni yangu kuhusiana na ujumbe waliopewa watoto na Mwadhama Polycarp Kardinali Pengo wakati wa kuadhimisha Jubilei yao iliyofanyika Desemba 28 mwaka huu.