Mkutano huo mkubwa na hadhara uliotawaliwa na vibweka vya hapa na pale ulifanyika kwenye viwanja vya bandari, eneo la Kurasini na idadi kubwa ya wakazi wa jiji la Dar es Salaam walijitokeza kwa wingi hasa ukichukulia kuwepo uchaguzi Mkuu Mwaka huu ambao sasa ni gumzo kona zote za jiji.

Lakini katika vyote vilivyofanyika kwenye mkutano huo wa CUF Jumapili iliyopita kilichonasa hisia, macho na mioyo ya watu waliohudhuria hapo haikuwa hotuba iliyotolewa na mgeni rasmi Bw. Tambwe Hiza kwenye mkutano huo bali ni vibweka na vituko vilivyoonyeshwa na mashabiki na wafurukutwa wa chama cha CUF. Ilikuwa kana kwamba unatazama sinema ya vituko, huku kituo kimoja baada ya kingine vikipewa nafasi ya kuonyeshwa jukwaani.

Ingawa ni jambo la kawaida vituko kuonekana kwenye mikutano ya kisiasa lakini baadhi ya vituko vilivyoonyeshwa na wafurukutwa wa CUF, siku hiyo vimewaacha watu walioshuhudia wakijiuliza kulikoni.

Kama ilivyo kawaida yetu waandishi wa habari ni nadra kwetu kupitwa na mambo; hivyo pamoja na kuwa siku hiyo ilikuwa ya mapumziko kwangu nyumbani nilijipa moyo na kujisogeza taratibu kwenye viwanja ambako CUF walikuwa wakiendesha mkutano wao kusudi nipate kushuhudia kwa macho yangu nini kinatokea.

Kati ya vibweka vyote vilivyoonekana siku hiyo kilichonasa macho na hisia zangu zaidi si kingine bali kuku mzima wa afya aliyebebwa kwenye ungo huku akidonoa unga.

Mwanzoni sikuamini kuwa ni kuku lakini kadiri jamaa aliyembeba alivyosogea karibu ndivyo nilivyoamini kuwa huyo ni "gweno" kweli kweli kama tulivyozowea kumuita kwa lugha ya mama yangu kule Tarime kwa akina Onyango.

Jamaa aliyembeba kuku huyo hakuwa na tofauti hata kidogo na Mganga wa jadi. Kwanza alikuwa amejitanda shanga na hirizi shingoni mwake na hakuvaa shati. Mkononi mwake alishika usinga ambao alikuwa akiupepea huko na kule.

Mambo hayakukamilia hapo, bali kichwani kwa jamaa huyo alibeba ungo uliojazwa unga, na ndani yake alikuwemo kuku aliye hai, huku wafurukutwa wakimsindikiza kwa vigelegele vya ‘CUF Ngangari - asiyeipenda akameze wembe’, yule kuku aliyekuwa kichwani mwake alikuwa akiendelea kudonoa ule unga taratibu.

Wakati huo Mwenyekiti wa CUF Wilaya ya Temeke Bw, Tambwe Hiza alikuwa tayari amekwishaianza hotuba yake. Wakati jamaa mwenye kuku kichwani mwake alipofikia jukwaa la kutolea hotuba ilimbidi mgeni wa heshima mwenyewe afyate mkia na kusitisha hotuba yake huku maneno ‘Asanteni sana waheshimiwa ‘ yakimtoka. Jamaa mwenye kuku kichwani alizunguka jukwaa mara tatu ndipo akasindikizwa nje ya halaiki ya watu na wapambe wake huku wakipiga ngoma na vigelegele.

Kabla Bw. Tambwe hajajiweka sawa kuendelea na hotuba yake kuliibuka kibweka kingine, safari hii haikuwa kuku tena bali nguo za ndani. Haijulikani nguo zile zilinunuliwa ama kushonwa wapi lakini kwa jinsi zilivyokuwa kubwa hata jitu la miraba minne kama hayati Pepe Kalle wa Kongo angefufuliwa leo azivae zingempwaya.

Nguo hizo tatu zilivalishwa kwenye nyaya zilizokunjwa moja ikiwa na mwandishi ‘Merry Christimas’. Sijui wafurukutwa wa CUF walioziandika hivyo walikuwa na maana gani kwa sababu kama sikukuu ya Krisimasi bado iko mbali nasi kwa miezi 8 mbele kwa sababu hata nusu mwaka hatujafikisha toka tuingie mwaka huu wa 2000.

Ama ndio tuseme huu mkutano wa Kurasini aliokuwa akiuhutubia Bw. Tambwe Hiza hapa Kurasini ndio ulikuwa Krisimasi ya wafurukutwa wa CUF jijini?. Hebu hayo na tuwaachie wenyewe wanayajua wao.

Lakini kwa vile wafurukutwa waliobeba zile nguo za ndani walikuwa ni wa kutoa chama cha CUF tawi la ‘Washington Manzese’ nahisi walizitoa kwenye marobota ya mitumba wanayoyauza pale Manzese darajani, sijui; nimebahatisha.

Lakini funga kazi akawa Mzee mpuliza zomari aliyeonyesha kila dalili kuwa alijaza pombe kichwani kabla ya kuja kwenye mkutano huu uliomleta karibu kila mfurukutwa wa CUF hapa Kurasini.

Huku akiwa kavalia ‘Over roll’ ya kijani, Mzee huyo aliyekuwa akiyumbisha yumbisha kichwa chake kwa kukolewa na kilevi alikuwa akipuliza zomari yake huku akishangiliwa. Muda wote huo vijana wakereketwa wa CUF walikuwa wakipokezana kumbeba kwa zamu.

Pembeni ya mzee huyo mwenye zomari nako alikuwepo jamaa mwingine mwenye ndevu ndefu mithili ya za manabii wa kale na mitume wa zamani. Jamaa huyo mwenye ndevu ndefu ambazo nikiziita ‘kichaka cha ndevu’ sijakosea alikuwa akisindikizwa na wafurukutwa wa CUF waliokuwa wakipiga makelele ya ‘Osama- Osama - Osama - Bin Laden.’ Sikupata fursa ya kuwauliza ni kwa nini waliamua kumbatiza palepale huyo jamaa jina la ‘Osama’ yule gaidi wa Saudi Arabia anayesakwa kwa udi na uvumba na Serikali ya Marekani. Lakini kwa waliopata kuziona picha za Bin Laden watakuwa na jibu tosha tayari kwa nini jamaa mwenye kichaka cha ndevu alipewa jina hilo.

Majina ya matawi yaliyo mengi ya CUF yalikuwa ni ya maeneo mbali mbali duniani yaliyotawaliwa na migogoro ya kisiasa na vita. Moja ya matawi hayo yalikuwa ni pamoja na ‘Chechnya, Bosnia, Palestina, Kosovo, Kwazulu Natal na Irak. Kana kwamba hilo halitoshi, kwenye mabango yenye majina ya matawi hayo kulichorwa mafuvu ya binadamu na mifupa yake na mengine yalichorwa picha za wapiganaji wenye silaha.

Kuonyesha kuwa mabango hayo yalikuwa na ujumbe wa kivitendo zaidi ya jina tu, kabla hatujataharuki Bw. Tambwe alitangaza kuwa wafurukutwa wa CUF waliompa kipigo kikali mwandishi wa habari wa gazeti la Majira warejeshe mkoba wake na lensi ya kamera mara moja ili kuepuka kuchafua jina la CUF. Ndipo nikaamini kweli Kosovo imehamia Dar es Salaam. Mungu ibariki Tanzania, Mungu ibariki Afrika.

Akisoma mashitaka hayo mbele ya hakimu Bi. Mary Mambali, karani wa Mahakama hiyo Bi. Blandina Mayoya alisema, mnamo Machi 24, mwaka huu, katika eneo la Kijitonyama jijini, inadaiwa kuwa mshitakiwa aliiba vioo viwili vya mbele na kioo cha nyuma vya gari mali ya Salome Kasembe, gari hiyo ilikuwa ina namba za usajili TZL 272.

Mshitakiwa amekana shitaka na amerudishwa rumande kwa kukosa wadhamini na kesi itatajwa tena tarehe 18 mwezi huu.

Katika kesi nyingine, mkazi wa Sinza Roiter Temba amemfikisha katika mahakama ya Mwanzo ya Kinondoni, Atu Amini(33) mkazi wa Sinza kwa shambulio la kudhuru mwili.

Akisoma kesi hiyo Karani wa Mahakama hiyo, Mwanahamisi Badri alisema mbele ya hakimu kuwa mnamo Machi 29, mwaka huu, Atu Amini alimshambulia mshitaki kwa kumpiga ngumi na kumkwaruza na makucha usoni hali iliyomsambabishia maumivu makali.

Mshitakiwa alikana shitaka na yuko nje kwa dhamana, kesi yake itatajwa tena tarehe 18 mwezi huu.

Katika kesi nyingine, mkazi wa Kinondoni, Bakari Seneda amepandishwa kizimbani katika mahakama hiyo kwa kumchoma Kasimu Ramadhani Kisu.

Akisoma shitaka hilo msoma mashitaka, Blandina Mayaya alisema mbele ya hakimu Bi. Mary Mambali alidai kuwa mnamo Desemba 8, mwaka 1999 majira ya saa 8 usiku, mshitakiwa alimchoma kisu mlalamikaji, Kassimu Ramadhani walipokuwa wanatoka kazini kwao Osterbay Hoteli.

Mlalamikaji alidai kuwa mshitakiwa alianza kumtukana wakati yeye na wenzake wakiwa katika basi lao la kazini wakisubiri kwenda nyumbani.

Mlalamikaji alidai kuwa alipojibu matusi hayo, ndipo mshitakiwa alitoa kisu na kumchoma mara tatu.

Mshitakiwa amekana shitaka na kesi yake itasikilizwa tena tarehe 20 mwezi wa 4 mwaka huu.

Sherehe hiyo ilifanyika Jumapili ya Tatu ya Kwaresma katika Kanisa Kuu la Jimbo lililoko parokia ya Mt.Theresia wa Mtoto Yesu ambapo Paroko wa parokia hiyo, Padre Augustin Temu aliongoza ibada hiyo ya Misa Takatifu iliyojaa vifijo na nderemo kuashiria shangwe na furaha.

Padre Temu ambaye pia ni Makamu wa Askofu Mkuu jimbon ihumo,alikiri kufurahishwa kwake kwa adhimisho hilo la aina yake lilitanguliwa na maandamano ya WAWATA waliovalia sare ya vitenge nadhifu vyenye nembo ya Jubilei Kuu ya miaka 2000 ya ukristu duniani wakibeba aina mbalimbali za zawadi.

Katika mahubiri yake, aliielezea WAWATA kuwa ni chama cha kitume kinachomjumuisha kila mwanamke mbatizwa na Kanisa Katoliki nchini, hivyo haoni sababu ya wanawake wengine Wakatoliki kutoshiriki kikamilifu nafasi yao katika Kanisa kama WAWATA.

Sambamba na bainisho hilo, Padre Temu pia kwa msisitizo mkali aliwataka waumini waelewe tena kuwa WAWATA ni chama cha kitume na wala siyo miradi au mikopo, mikopo hawana budi kuondokana na dhana hiyo potofu ambayo haina tofauti na tabia ile iliyomfanya Bwana wetu Yesu Kristu apindue meza za wafanyabiashara hekaluni na kisha kufunga kikoto na kuwachapa kwani waligeuza hekalu kuwa ni pango la wanyang’anyi na sehemu ya biashara alisema Padre Augustin Temu.

Aidha Mwenyekiti wa WAWATA jimboni Arusha Bi. Wilhelimina Irafay aliahidi kuwa kwa ushirikiano na maparoko na vingozi wenzake wa ngazi zote wataivalia njuga dhana hiyo potofu ili kuondoa kabisa cheche za uhasama na kiburi kwani miradi au mikopo ndani ya WAWATA ni ziada tu na wala siyo lengo msingi.

Akitoa mada katika semina ya siku tatu iliyofanyika katika kumbi mbalimbali ikiwa ni Baraza la Maaskofu Katoliki Tanzania (TEC), Ofisi ya Wakuu wa Wilaya za Temeke na Kinondoni, Mtaalamu na Mshauri wa Maswala ya Fedha wa Serikali za Mitaa Bw. Maheke John Gikene, alisema kila Halmashauri itapewa milioni 40/= ambazo zitagawanywa katika makundi mawili ikiwa ni milioni 15 na milioni 25.

Alisema milioni 15/= zitatumika katika uporeshaji wa shughuli na kupeleka Semina za washirika(DAU)vikao vya CRT ikiwa ni pamoja na gharama zote za usafiri posho na watoka nje ya mikoa.

Nyingine ni uandaji wa taarifa mbalimbali zinazohusu(CRT), Mwenyekiti wa Serikali za mitaa pamoja na usimamizi au ufuatiliaju wa kazi zote.

Aliendelea kudai kuwa milioni 25/= zitatumika kama chachu ya maendeleo ya watu isipokuwa itaruhusiwa kununulia vitendea kazi kama Computer, Typewritter, Photocopy na fenicha za ofisini.

Bw. Gikene alisema kuwa CRT ni lazima itengeneze mpango wa kazi na vipindi vya kazi ambayo CRT itakuwa ikiwakilisha katika ngazi za juu.

Hayo yalisemwa na Afisa Utawala wa Wilaya ya Kinondoni Bi. Beatrice Mwambane wakati wa ufunguzi wa mafunzo ya kilimo na ufugaji bora katika kituo cha Christian Professionals of Tanzania (CPT) kilichopo Bunju ‘A’ wilayani humo chenye vijana wapatao 13.

Aliwapongeza waanzilishi wa kituo hicho na kusema kuwa ni chenye manufaa kwani kinawajenga vijana na kuwakuza katika maadili mema yenye utamaduni wa kuzingatia kufanya kazi ili kujipatia riziki.

Alisema mafunzo hayo yenye manufaa kwa jamii nzima ya Watanzania yatawawezesha kujiajiri wenyewe kwa ufanisi zaidi wanapohitimu mafunzo yao.

Aliongeza kuwa kwa kutumia ujuzi wanaoupata, vijana hao pia wataweza kuwasaidia vijana wenzao wenye nia njema ya kujiendeleza na kutumia mbinu muafaka katika kupambana na ugumu wa maisha.

Kituo hicho cha CPT kilicho ndani ya Kanisa Katoliki chenye makao yake makuu jijini Dar es Salaam, kina eneo la ekari 50 za shamba zilizotolewa na Serikali ya Mtaa wa Bunju miaka ya 1980.

Lengo la kituo hicho ni kutoa mafunzo ya nadharia na vitendo kwa vijana wasio na ajira ili baadaye waweze kufanya shughuli za kilimo na ufugaji ili kujinufaisha katika maisha yao na vijana hao wamekuwa wakipewa maelekezo ya kilimo cha mboga na namna ya kutayarisha maeneo kwa kilimo cha mazao ya chakula.

Wanapata huduma ya chakula na wamepewa vitendea kazi ambapo kwa kipindi hicho wamekuwa hawachangii gharama zozote zile.

Kituo pia kitatoa mafunzo mengine ya biashara, ushirika, utunzaji wa kumbukumbu na hesabu za fedha, masoko, kuweka na kukopa, Elimu ya malezi na maadili bora pamoja na uraia ambapo kituo kinapokea vijana wa kiume wenye elimu ya msingi na sekondari kuanzia umri wa miaka kati ya 15-25 na Baadye, kituo kinatarajia kupokea na muda wa mafunzo utakuwa mihula miwili ya miezi 18 kwa kila muhula.

Muhula wa kwanza utakuwa kw ajili ya mafunzo ya nadharia na vitendo na muhula wa pili ni wa uzalishaji.

Katika ufunguzi wa mafunzo hayo vijana waliwashukuru CPT kwa kuwasaidia kwa kuanzia katika mazingira mabaya ya Dar es Salaam ambayo yana kila hali ya uozo na kuwapa mafunzo maisha yao.

Awali, Mwenyekiti wa CPT Taifa Bw. Khamillius Kassalla na Mratibu wa kituo hicho Bi. Mariam Kessy waliwataka vijana hao kuongeza juhudi katika shughuli zao ili wawe na maisha mazuri mara watokapo kituoni hapo na kuanza kujitegemea.

Rai hiyo imetolewa na Mwenyekiti wa shirika hilo Mhasham, Askofu Agapiti Ndorobo alipokuwa akifungua semina ya siku nne iliyofanyika katika ukumbi wa Baraza la Maaskofu Ktoliki Tanzania(TEC) uliopo Kurasini Jijini Dar-Es-Salam.

Mhasham Ndorobo ambaye pia ni Askofu wa Jimbo Katoliki la Mahenge alisema kuwa ni vyema misaada hiyo kuwafikia walengwa na hapo watakuwa waaminifu mbele za Mungu pamoja na kwa wale wafadhili ambao hutoa misaada hiyo.

"Tunatakiwa tuwe waaminifu katika kazi zetu na pindi tunapopokea misaada inayotoka kwa wafadhili kuwafikia walengwa kama ilivyokusudiwa," alisema Mhasham Askofu Ndorobo.

Aliyashukuru majimbo ambayo yameshatoa mchango wao na yale ambayo yanaendelea kutoa msaada kwa ajili ya watu waliopatwa na mafuriko nchini Msumbiji.

Awali akimkaribisha Kaimu Katibu Mkuu wa Baraza la Maaskofu Katoliki, Naibu Katibu Mtendaji wa Caritas Tanzania BW. Peter Maduki aliwataka watendaji wa majimbo hayo kuhakikisha kuwa wanawakilisha kumbukumbu zao katika ofisi za CARITAS taifa pindi wanapotoa msaada kwa wahusika ili iwe rahisi kuyatambua majimbo yaliyokwisha toa misaada pamoja na kiasi na aina ya misaada nam,na inavyotumika.

"Tunaomba tuletewe taarifa mapema pindi jimbo linapotoa msaada kwa watu husika ili iwe rahisi kuwafahamisha wafadhili wetu wajue tumeitumia vipi misaada hiyo," alisema Bw. Maduki.

Semina hiyo iliwahusisha waratibu kutoka majimbo ya Kikatoliki Tanzania.

Akizungumza katika warsha ya siku tano ya Mahakama za Mwanzo za Kanda ya Dar es Salaam, Mkurugenzi wa Kituo cha Kutetea Haki za Binadamu (LHRC) Bibi Hellen Bisimba, alisema kuwa hilo ni tatizo sugu katika Mahakama za Mwanzo.

MKurugenzi huyo alisema kuwa kuna malalamiko mengi yanayofikishwa katika kituo hicho ambayo chimbuko lake ni mahakimu kushindwa kuwaongoza raia wanaofika mbele yao jambo ambalo linachangia ukiukwaji wa haki za binadamu.

Alisema kuwa kesi inaweza kutolewa hukumu lakini hakimu asimueleze mtuhumiwa kuwa ana nafasi ya kukata rufaa kama hakuridhika na adhabu iliyotolewa ha mahakama hiyo.

"Baadhi ya mahakimu wamekuwa hawawaongozi raia ili kufahamu ni nini wanaweza wakafanya nje na ndani ya mahakama"

Alisema na kuongeza kuwa tatizo hilo lipo na hufikia wakati watuhumiwa wanakuwa hawajui kama wana haki ya kupata dhamana.

Kwa mujibu wa mchungaji wa kanisa hilo, Marko Ndumi aliyezungumza na Mwandishi wa habari hizi katika ofisi za Kanisa hilo Ukonga jijini, ujenzi wa kanisa hilo litakalozinduliwa na Waziri, ulianza mwaka 1994 kwa nguvu za waumini baada ya kuona kanisa lililopo ni dogo chini ya mchungaji wa kike, Deborah Manyerere.

Alisema hadi lilipofikia sasa, kanisa hilo, limekwisha gharimu kiasi cha shilingi milioni 55/= zilizotokana na michango ya waumini.

Aliongeza kusema kuwa ili ujenzi wa kanisa hili ukamilike zinahitajika shilingi milioni 80/= zaidi.

Alisema katika sherehe hizo za kuweka jiwe la msingi, kutakuwa na harambee kwa ajili ya kuchangia kutunisha mfuko wa ujenzi wa kanisa hilo.

Sherehe hizi za uwekaji wa jiwe la msingi zitahudhuriwa pia na Askofu Jerry Mngwamba wa Dayosisi ya Mashariki na Pwani ya KKKT.

Mchungaji Marko Ndumi amesema mpango wa kuanzisha chama hicho ni kuwasaidia waumini waweze kujiajiri wenyewe katika shughuli ndogondogo.

"Serikali sasa hivi haiajiri wafanyakazi, hivyo kupitia chama hiki vijana wataweza kujiajiri wenyewe kwa kuweka na kukopa kutoka katika chama hicho" alisema Mchungaji Ndumi.

Alisema mbali na chama hicho cha kuweka na kukopa kanisa linatarajia kuanzisha darasa la ufundi seremala na uashi ili kuwasaidia vijana wanaomaliza darasa la saba na kushindwa kuendeleza na masomo ya sekondari waweze kujiajiri wenyewe baada ya kupata mafunzo hayo.

Aliongeza kusema kuwa ujenzi huo wa darasa la ufundi utakwenda sambamba na ujenzi ya shule ya awali kwa ajili ya watoto na waumini na watoto wengine. Kutokana na tatizo la maji jijini Dar Es Salaam, Kanisa pia limeamua kuchimba kisima ili kuwasaidia wanafunzi wa darasa la shule ya awali waweze kupata maji karibu. Pialina mpango wa kujenga ukumbi wa mikutano na Hosteli.